Ötən ayın son günündə - oktyabrın 31-də Nizami Gəncəvi adına Milli Azərbaycan Ədəbiyyatı muzeyinin İstiqlal zalı mehriban xatirələrin işığına bürünmüşdü. Bir zanmanlar bu binaya hər gün işə gedib-gəlmiş, neçə əsərinin müzakirəsi burada keçirilmiş, qələm dostları ilə bu məkanda illər boyu qayğılarını, düşüncələrini, arzularını bölüşmüş unudulmaz Mir Cəlal yenə qayıtmışdı.
Elə keçmişlərdə olduğu kimi canlı surəti, səsi də burdaydı, haqqında söylənən isti xatirələrlə elə özü də nəfəsi duyulacaq qədər yaxında idi.
Müasirləri, doğmaları, tələbələri danışırdılar.
Siz hər biriniz Mir Cəlalı, əlbəttə ki, əsərlərindən tanıyırsınız.
Amma inanıram ki, iki saat yarımlıq xatirə gecəmizi izlədikdən sonra siz Mir Cəlalı həm bir yazıçı, həm insan olaraq daha yaxından tanıyacaq, daha artıq sevəcəksiniz və içərinizdə bu ehtiyac da yaranacaq ki, onun tanış kitablarını yenidən açasınız.